Nunatsinni Advokatit malittarisassaat

  1. Najugaqarfiusoq siunertaasorlu

§ 1

Imm. 1. Peqatigiiffik ateqarpoq ”Nunatsinni Advokatit * Grønlandske Advokater”.

Imm. 2. Peqatigiiffiup najugaqarfigaa Kommuneqarfik Sermersooq.

§ 2

Imm. 2. Peqatigiiffiup siunertaraa

Advokatitut ataqqinassutsimik pitsaanerulersitsinissaq

Pikkorissuseqarnerulernissaq

Inuussutissarsiutitigut soqutigisanik siuarsaanissaq aamma

Suleqatigiittut atugarisanik pitsanngorsaanissaq

  1. Ilaasortat

§3

Imm. 1. Advokatitut suliffeqarfiit Kalaallit Nunaanni angerlarsimaffillit Kalaallillu Nunaanni eqqartuussisarnermut inatsisip § 76-ianni piumasaqaataasunik naammassinnissimasut kisimik peqatigiiffimmi ilaasortaasinnaapput.

Imm. 2. Ilaasortaasut tassaapput suliffeqarfinni advokatitut sulisut tamarmik advokatitut sulinissamut pisinnaatitaaffiligaasimasut aamma advokatfuldmægtigitut Kalaallit Nunaanni Eqqartuussivimmit pisinnaatitaaffiligaasimasut.

  1. Ilaasortanngortarneq ilaasortaajunnaartarnerlu

§ 4

Imm. 1. Ilaasortanngorniarneq pisassaaq siulersuisunut qinnuteqaammik tunniussinikkut. Ilaasortanngornissaq siulersuisunit aalajangersarneqartarpoq. Ilaasortanngorniarluni qinnuteqaat itigartinneqarsinnaavoq tamatumunnga tunngavissaqarpat. Siulersuisut aalajangiussaat qinnuteqartup ataatsimeersuarnissamut tullermut oqaluuserisassanngortissinnaavaa eqqartuussivimmulli suliassanngortissinnaanagu.

Imm. 2. Ilaasortanngornerup malitsigisaanik ilaasortaanermut akiliut ukiumut atuuttumut tunngasoq akilerneqassaaq. Ilaasortanngornermut akiliut 2009-mi pilersitsiffiusumik ataatsimeersuartunit aalajangersarneqartussaavoq.

§ 5

Imm. 1. Ilaasortaajunnaarneq allakkatigut nalunaarutigineqassaaq.

Imm. 2. Ilaasortaq peqatigiiffimmit anisoq sunaluunniit pissutaagaluarpat akiliutiminik imaluunniit peqatigiiffiup aningaasaataanik piginneqatiguussutaasunik utertitsiffigineqarsinnaanngilaq.

  1. Anisitaaneq

§ 6

Imm. 1. Siulersuisut 2/3-iimik amerlanerussuteqartut aalajangersinnaavaat ilaasortap anisitaanissaa, ilaasortaq imaluunniit taassuma sulisuisa imaluunniit piginnittuusup imaluunniit peqatigiiffiup malittarisassai arlaleriarlutik unioqqutinneqarsimappata imaluunniit pissusilersuutimigut imaluunniit suliffeqarfiup advokatitut, advokatfuldmægtigitut advokatitullu ataqqinassusia nikanarsarpagu.

Imm. 2. Anisitaaneq aalajangiunneqartinnagu ilaasortaq siulersuisunut oqaaseqaateqarnissaminut periarfissinneqassaaq. Siulersuisut imm. 1. naapertorlugu anisitsinissamik aalajangiisigatik ilaasortaq qaammatinik arfinilinnik sivisussisilikkamik periarfississavaat anisitaanissaq pitsaaliorniarlugu iliuuseqarniarnissaanut.

Imm. 3. Anisitsineq atuutilissaaq siulersuisut tamatuminnga aalajangerneranniit piffissaliussaq naappat imaluunniit takuuk imm. 2.

Imm. 4. Siulersuisunit aalajangiunneqartut anitsitsinermut tunngasut anisitaasumit ataatsimeersuarnermut tulliuttumut oqaluuserisassanngortinneqarsinnaapput eqqartuussimmulli suliassiissutigineqarsinnaanatik.

Imm. 5. Ilaasortaasoq peqatigiiffimmit anisinneqassaaq ilaasortaq akileeqqussissutinik pissarsisisimagaluarluni ukiup affaani akilerneqarsimanngitsunik akiligassaqalersimappat.

5. Ilaasortaanermut akiliut

§ 7

Imm. 1. Ukiumi naatsorsuusiorfiusumi ilaasortaanermut akiliutissaq ataatsimeersuartunit aalajangersarneqassaaq. Ilaasortaanermut akiliut aalajangersarneqassaaq advokatit ataasiakkaat ilaasortatut akiliisittarlugit. Advokatfuldmægtiginut ilasortaanermut akiliut advokatit akiliutaasa affaattut annertussuseqassaaq. Ilaasortaanermut akiliummik akileeqqusineq januaarimi pisassaaq kingusinnerpaamik januaarip ulluisa 31-anni akilerneqareersimassalluni.

Imm.2. Ataatsimeersuartut 2/3-imik amerlanerussuteqarlutik aalajangersinnaavaat advokatit ataasiakkaat ilaasortatut immikkut akiliisinneqarnissaat.

Imm.3. Peqatigiiffimmit taamaallaat pisussaaffigineqarput peqatigiiffiup aningaasaatai, ilaasortanut ataasiakkaanut tunngasuunngitsut.

  1. Peqatigiiffiup pisussaaffii

Ataatsimeersuarneq

§ 8

Imm.1. Ileqquusumik ataatsimeersuarneq pisassaaq ukiut tamaasa septembarip qaammataani. Ileqquusumik ataatsimeersuarnermut immikkullu ittumik ataatsimeersuarnermut piffissaliunneqartoq sumiiffissarlu siulersuisunit aalajangerneqartassaaq.

Imm.2. Siulersuisut ataatsimeersuarnissamut qaaqqusissapput. Ataatsimeersuarnissamut aggersaasoqassaaq sivikinnerpaamik sapaatip akunneri pingasut sioqqullugit, ilaasortat elektroniskimik (e-mailikkut) nalunaarfigalugit.

Aggersaanermut ilanngunneqarsimassaaq ullormut oqaluuserisassat allattorsimaffiat, tassunga ilanngullugit siulersuisut imm.3-mi immikkoortut 4-8 malillugit siunnersuutaat.

Imm.3. Ileqquusumik ataatsimeersuarnermi ullormut oqaluuserisassat imaassapput:

  1. Aqutsisussamik qinersineq

  2. Siulersuisut nalunaarutaat

  3. Ukiumoortumik naatsorsuutinik kukkunersiukkanik saqqummiussineq akuersinerlu.

  4. Siulittaasumik qinersineq.

  5. Siulersuisunut ilaasortanik allanik qinersineq.

  6. Kukkunersiuisumik qinersineq.

  7. Ukiumi naatsorsuusiorfiusumi ilaasortaanermut akiliummik aalajangersaaneq.

  8. Siulersuisunit siunnersuutaasinnaasut.

  9. Ilaasortanit siunnersuutaasinnaasut.

  10. Tamalaat.

Imm. 4. Ilaasortat siunnersuutaat imm.3-mi immikkoortut 4-6-imut aamma 9-mut tunngasut siulersuisut siulittaasuannut tunniunneqareersimassapput ataatsimeersuarnissaq sapaatip akunnerinik marlunnik sioqqullugu.

Imm. 5. Siulersuisut siunnersuutitik ilaasortanut tamanut mailikkut nassiutissavaat, takuuk imm. 4. kingusinnerpaamik ataatsimeersuarnissaq ullunik pingasunik sioqqullugu.

§ 9

Imm. 1. Siulersuisut immikkut ittumik ataatsimiigiaqqusissapput tamanna pisariaqartutut isigigunikku.

Imm. 2. Ilaasortat marluk allakkatigut allassimasumik siunnersuuteqarlutik immikkut ittumik ataatsimeersuarnissamik piumasaqarlutik siulersuisunut saaffiginninneranniit kingusinnerpaamik ullut arfineq-pingasut qaangiunneranni siulersuisut immikkut ittumik ataatsimiigiaqqusissapput.

Imm. 3. Immikkut ittumik ataatsimiigiaqqusisoqassaaq sivikinnerpaamik sapaatip akunneranik sivisunerpaamillu sapaatip akunnerinik marlunnik mailikkut ilaasortanut tamanut aggersaanikkut.

 

§ 10

Imm.1. Ataatsimeersuarnerni taamaallaat siunnersuutit aggeqqusissummi taaneqartut oqaluuserineqassapput, takuuk §8-mi imm.2. imaluunniit ilaasortanit siunnersuutit, takuuk § 8, imm. 4 aamma 5.

Imm.2. §8-mi imm.3-mi immikkoortut 4, 5 aamma 6 naapertorlugit qinigassanngortissinnaasut naammanngippata ataatsimeersuartunit siunnersuutigineqartut malillugit ilaasortat amigaataasut qinerneqassapput.

§ 11

Imm.1. Ataatsimeersuarneq aqutsisumit ataatsimeersuartunit qinikkamik aqunneqassaaq taassumalu apeqqutit suliassiissutaasut qanoq suliarineqarnissaat aalajangersaaffigissavai, qinersisitsissalluni angusanillu saqqummiissalluni.

Imm.2. Ataatsimeersuarnermit naalisagaq ilaasortanut elektroniskimik nassiunneqareersimassaaq

(e-mailikkut) kingusinnerpaamik ataatsimeersuarnermit ullut 14-it qaangiunneranni.

 

§ 12

Imm.1. Ataatsimeersuartunit aalajangiiffigisassat taamaallaat kinguliini immikkoortut taaneqartut pinnagit amerlanerussuteqartunit aalajangiiffigineqassapput.

Imm.2. Malittarisassanik allanngortitsinerit imaluunniit § 4-mi imaluunniit § 6-imi siulersuisunit aalajangiussanik akuersineq pissaaq siunnersuummut taasisut 2/3-iisa amerlanerussuteqartitsinerisigut.

Imm.3. Taasinngitsoornerit aamma taasinerit atorsinnaanngitsut taasinertut naatsorsuunneqassanngillat.

Imm.4. Peqatigiiffimmik atorunnaarsitsineq pissaaq peqatigiiffiup ilaasortaasa 2/3-iisa najuunnerisigut kiisalu siunnersuummut taasinerit 2/3-imik amerlanerussuteqartitsippata. Ataatsimeersuarnermi pineqartumi siunnersuummut taasinerit 2/3-iuppata ataatsimeersuartulli aalajangiisinnaanngippata siulersuisut ullut arfineq-pingasut qaangiutsinnagit ataatsimeersuartitseqqissapput, tassanilu siunnersuut akuerineqartutut naatsorsuunneqalissaaq siunnersuummut taasisut 2/3-iisa tamanna akuersaarpassuk.

Imm.5. Peqatigiiffik atorunnaarsinneqassappat ataatsimeersuartut peqatigiiffiup aningaasaatai aalajangersaaffigissavaat.

§ 13

Imm.1. Ataatsimeersuarnermi ilaasortat tamarmik taasinermik ataatsimik taasisinnaatitaapput.

Imm.2. Taaseqataanissamut piumasaqaataavoq nammineq takkunnissaq imaluunniit advokatimik peqateqarluni telefonikkut ataatsimeeqataanissaq.

 

Siulersuisut

§ 14

Imm. 1. Peqatigiiffiup siulersuisui tassaapput siulittaasoq siulersuisunullu ilaasortat 2-3-t taakkulu ileqquusumik ataatsimeersuarnermi ukioq naatsorsuusiorfiusoq ataaseq naallugu qinigaaffeqarput.

Imm. 2. Siulittaasutut siulersuisunilu ilaasortatut qinigassanngortissinnaapput advokatit advokatip suliffeqarfiutaani atorfillit imaluunniit piginnittut taakkulu peqatigiiffimmut ilaasortaassapput.

Imm.3. Siulittaasoq qinerneqaqqaassaaq amerlanerussuteqarlunilu taaneqartoq qinigaassalluni. Kingorna siulersuisunut ilaasortat allat qinerneqassapput; Amerlanerussutilimmik taaneqartut qinigaassapput. Qinigaaqqittoqarsinnaavoq siulersuisunulli ilaasortat siulersuisuniissinnaatitaapput ukiut naatsorsuusiorfiusut tallimat sinnernagit.

Imm. 4. Siulersuisut namminneq siulittaasup tullia aningaaserisorlu siulersuisunut ilaasortat akornanni qinissavaat .

 

 

§ 15

Imm.1. Peqatigiiffik siulersuisunit aqunneqassaaq taakkulu aalajangersakkanik akuerineqarsimasunik ingerlatsissapput. Siulersuisunut ilaasortat piumasaqaataat naapertorlugit ataatsimiittoqartassaaq. Aalajangiisinnaatitaassapput minnerpaamik ilaasortat pingasut najuuttoralugit taakkununngalu ilaassaaq siulittaasoq siulittaasulluunniit tullia. Taasinerit aalajangersarneqartassapput amerlanerussuteqarnikkut, takuulli § 6-imi imm. 1. Taasinerit naligiippata siulittaasup (siulittaasup tulliata) taasinera aalajangiisuussaaq.

 

  1. Atsiorsinnaatitaanermut malittarisassaq

§ 16

Imm.1. Peqatigiiffimmi atsiorsinnaatitaassaaq siulittaasoq siulittaasulluunniit tullia siulersuisunut ilaasortamik ataatsimik peqateqarluni.

  1. Naatsorsuutit kukkunersiuinerlu

§ 17

Imm.1. Naatsorsuutit atuutissapput 1.juulimit 30. juunimut. Ukiup naatsorsuusiorfiusup naaneri tamaasa ukiumi qaangiuttumi ingerlatsineq naatsorsuutillu inerneri suliarineqartassapput.

Imm.2. Naatsorsuutit naammassineqareersimassapput aggustip 15-iat tikitsinnagu kukkunersiuisumillu misissorneqarsimassallutik tamatumalu kingorna septembarip aallaqqaataat tikitsinnagu naatsorsuutit kukkunersiorneqarsimasut siulersuisunut nassiunneqarsimasussaallutik.

  1. Atortussanngortitsineq

§ 18

Imm. 1. Malittarisassat akuerineqarlutik atortussanngortinneqarput peqatigiiffiup pilersitsiffiusumik ataatsimeersuarnerani 26. februar 2009-mi pisumi.

Malittarisassani § 1, imm. 1 aamma § 6, imm. 1. allanngortinneqarput ileqquusumik ataatsimeersuarnermi siullermi 10. december 2009-mi pisumi.

Aqutsisoq

_________________

Advokat Finn Meinel