Advokati kukkuluttorsimasorigukku

Advokati maalaarutiginiarukku maalaarutit uunga nassiussinnaavat:

Advokatsamfundets sekretariat
Kronprinsessegade 28, 1306 København K
Tlf. +45 33 96 97 98 – nal. 9.30-12.30 (danskit piffissaat)

Maalaaruteqarnermi immersugassat uani pissarsiarisinnaavatit www.advokatnaevnet.dk/Default.aspx?ID=11.

Advokatimut akiligassat pillugit maalaarutit (Salærinut maalaarutit)

Eqqartuussisarnermut inatsisip § 78-ianni, imm. 2 naapertorlugu ataatsimiititamit naliliiffigineqassaaq akiliutissaq naapertuuttuunersoq. Advokatinut ataatsimiititap akiliutissaq akuerisinnaavaa annikillisilluguluunniit.

Advokatimit pineqarnerit suliassiissutivilluunniit pineqarnera pillugu maalaarutit (pissusilersuutinut maalaarut/ileqqussanik malinneqqissaarnissaq pillugu maalaarutit)

Ataatsimiititamit naliliiffigineqassaaq advokati advokatinut ileqqussarititaasut uniorlugit iliuuseqarsimanersoq. Advokatinut ileqqussarititaasut eqqartuussisarnermut inatsip § 78-ianni allassimapput. Ataatsimiitaq isumaqarpat advokati advokatinut ileqqussarititaasut uniorlugit iliorsimasoq ataatsimiitamit advokatit pineqaatissinneqarsinnaavoq. Pineqaatissiissut tassaasinnaavoq avoqqaarinninneq imaluunniit akiligassinneqarneq.

Taarsiiffigitinneq

Advokatit ataatsimiititaanit isummerfigineqarsinnaanngilaq advokatimit taarsiiffigineqarnissamik piumasaqaatit. Isumaqaruit taarsiiffigineqarnissamik piumasaqarsinnaallutit nammineerlutit advokatit pillugu eqqartuussivikkut nalinginnaasumik suliassanngortitsisinnaavutit.

Advokatimit taarsiiffigineqarnissamik piumasaqaat nalinginnaasumik pisoqalisarpoq ukiut tallimanngoraangata, imaappoq ukiut tallimat qaangiukkaangata atorsinnaajunnaartarluni. Ukiut tallimat qaangiunnerisigut pisoqalinera atuuttarpoq advokatinnut maalaaruteqarsimagaluaruilluunniit.

Maalaarutit qanoq pisarpat?

Siullermik allattoqarfiup advokati maalaarutaasimasoq nassuiaateqarnissamik piumasaqarfigisarpaa. Nassuiaatip assilineranik pissaatit allakkatigullu periarfissaqarputit akerliliinissannut, isumaqaruit advokatippit nassuiaataa eqqortuunngitsoq.

Advokatippit nassuiaataa naammaginngikkukku tamannalu allakkatigut nalunaarutigisimallugu, advokatit nutaamik nassuiaateqartussaavoq.

Suliani ataasiakkaani pisariaqarsinnaavoq maalaarutip suliarineqannginnerani ilinnit advokatimilluunniit sukumiinerusumik nassuiaammik piumasaqarnissaq.

Maalaarutit suliarineqartarput allakkiatigut tunngavissat najoqqutaralugit, illuatungiusorli piumasaqarsinnaavoq nammineerluni Advokatinut Ataatsimiititamut ornigulluni nassuiaateqarnissamik allakkiatigut tunngavissanut ilassutaasumik. Illuatungerisat nammineerluni ornigunnissamik piumasaqarpat tamatuma malitsigisaanik illuatungiusoq nammineerluni orniguttariaqanngilaq.

Itigartitsinerit

Advokatinut Ataatsimiititap maalaarut makkua pissutigalugit itigartissinnaavaa:

1. Maalaarut kingusinaarluni nassiunneqarsimappat

2. Maalaarut ersittumik tunngavissaqanngippat

3. Maalaarut ataatsimiititamit suliarineqarsinnaanngippat

4. Maalaarut eqqartuussinermut tunngasuunngippat.

1.-imut tunng. Advokatinut Ataatsimiititap allattoqarfianit maalaarut itigartinneqartarpoq maalaaruteqarnissamut piffissarititaasoq qaangiutereersoq maalaartoqarsimappat. Allattoqarfiup itigartitsissutaa Ataatsimiititamut ingerlateqqinneqarsinnaavoq. Ataatsimiititap aalajangerneq attatiinnarsinnaavaa imaluunniit killissarititaasumik qaangiineq pisimagaluartoq immikkut ittumik akuersissuteqarluni. Ataatsimiititap aalajangernera atuuttussaatitaavoq. Ataatsimiititaq immikkut ittumik akuersisarpoq maalaaruteqarnissamut killissarititaasup qaangiussimaneranut tunngavilersukkamik pissutissaqarpat. Immikkoortoq una atuaruk: Piffissaliinerit.

2.-mut tunng. Ataatsimiititap maalaarutaasoq itigartissinnaavaa ersittumik tunngavissaqanngitsutut nalilerunikku, imatut paasillugu maalaarutip atorsinnaasumik tunngavissaqannginnera takuneqarsinnaappat. Ataatsimiititap aalajangernera atuuttussaatitaavoq. Tamanna isumaqarpoq aalajangerneq pisortat aqutsisoqarfiannut allamut ingerlateqqinneqarsinnaanngitsoq.

3.-mut tunng. Ataatsimiititap maalaarutaasoq itigartissinnaavaa maalaarutaasoq Ataatsimiititap suliassaanut attuumassuteqanngippat. Suliat taamaattut taakkuusinnaapput ersernerluttumik uppernarsaasersukkat. Aamma taakkuusinnaapput suliat taarsiissuteqarnissamik piumasaqaateqarfiusut.

4-mut tunng. Ataatsimiititap maalaarutaasoq itigartissinnaavaa maalaartoq eqqartuussinermut tunngasuunngitsumik maalaaruteqarpat. Assersuutigalugu illit suliamut attuumassuteqarsimanngikkuit.

Suliassat kikkunnit suliarineqartarpat?

Advokatinut Ataatsimiititaq 21-nik ilaasortaqarpoq. Ilaasortanit qulingiluat advokatiupput, pingasut eqqartuussisuullutik ilaasortallu allat qulingiluat Inatsisinik Atortitsinermut Ministereqarfimmit toqqagaallutik.

Ataatsimiititaq aalajangersaagaangat advokatit Inatsisinillu Atortitsinermut Ministereqarfimmit toqqagaallutik ilaasortat amerlaqatigiissinneqartarput. Taasinerit amerlaqatigiippata siulittaasup (eqqartuussisup) taasinera aalajangiisuusarpoq.

Ataatsimiititap ilaasortai 21-t ataatsimoorlutik sulisarput (kattullutik) kiisalu immikkoortortanut agguaallutik. Ataatsimiititaq pingasunik immikkoortortaqarpoq.

Suliat makku ataatsimoorluni suliarineqartarput:

1. Suliat tunngavissaanerusunut tunngasut

2. Suliat advokatitut suliffeqarfiuteqarsinnaajunnaarsitsinissamut tunngasut aamma

3. Suliat advokatitut suliffeqarfiuteqarsinnaajunnaarsitsinermik atorunnaarsitsinissamut tunngasut

Suliassat amerlanerpaartaat immikkoortortat pingasuusut arlaanni suliarineqartarput.

Ataatsimiititaq missingiullugu qaammammut ataasiarluni ataatsimiittarpoq.

Ataatsimiititaq aalajangiigaangat advokatit Inatsisinillu Atortitsinermut Ministereqarfimmit toqqagaallutik ilaasortat amerlaqatigiissinneqartarput. Taasinerit amerlaqatigiippata siulittaasup (eqqartuussisup) taasinera aalajangiisuusarpoq.

Malittarisassat

Advokati pillugu maalaaruteqarnissamut malittarisassat uani nanineqarsinnaapput:

1. Eqqartuussisarnermut inatsisip §§-iini 93 aamma 94

2. Danskit eqqartuussisarnermut inatsisaanni kapitali 15 a aamma 15 b

3. Inatsisinik Atortitsinermut Ministereqarfiup Advokatinut Ataatsimiititap qinersivinnilu siulersuisut advokatit assigisaalu pillugit maalaarutinik suliassiisarfeqarnerat pillugu nalunaarutaani nr. 20-mi 17/1 2008-meersumi.

Maalaarutinik suliaqartarneq pillugu sukumiinerusumik paasisaqarusukkuit takuuk www.advokatnaevnet.dk.